Fezâ-yı nâ-mütenâhîyi vasfa cür’et eden
Bilir mi zerrelerin şart-ı ittihadı nedir?
Bilir mi da’vâ-yı irfân-ı her hakîkat eden
Azîz rûhumuzun mebde’ ü miâdı nedir?
Sorulsa zerreye kuvvet nasıl olur ârız
Cevabı felsefenin bir hayâl-i fennîdir;
Sorulsa tıbba nedir fark-ı sâlim ü mârız
Sayar döker bize birçok araz ki zannîdir.
Mugâletât-ı riyâziyye eyliyor isbat
Ki hendeseyle hisâbın da gâyeti zandır.
Çıkarsa vâdi-i zanna reh-i bedîhiyyât
Nasıl denir faraziyyât-ı sırfaya «fendir!»
Besâiti sayamaz ilm-i köhne-i kimyâ;
Kuvâyı farkedemez sâlhurde hikmetler;
Bilinmiş olsa da farzen hakâyık-ı eşyâ
Kalır bize yine metbû’umuz hakîkatler!
Bilinmiş olsa da hakkıyle ilm-i cevv-i hevâ
Bulur muyuz kopacak girdibâda bir çare?
Bütün mebâhis-i rûhun bilinmesi acaba
Verir mi tesliye bir feylesof-ı gamhâre?
Zunûn-ı bîser ü bünle beni avutturma
İlâhi, ben kalayım tâ ebed bu zulmette!
İnâyet eyle bana cehlimi unutturma
Felâhyâb olurum belki ben bu hikmette!
Darağacı Sanat 